Ақмола облысының аумағында шектеу карантиндік шараларын кезең-кезеңімен жеңілдету туралы

Ақмола облысының Бас мемлекеттік санитариялық дәрігерінің 2020 жылғы 7 қарашадағы № 136 Қаулысы

«Халық денсаулығы және денсаулық сақтау жүйесі туралы» Қазақстан Республикасының 2020 жылғы 07 шілдедегі Кодексінің 9, 36, 102, 104 және 107 баптарына, «Пайда болу және таралу қаупі төнген кезде шектеу іс-шаралары, оның ішінде карантин енгізілетін инфекциялық аурулардың тізбесін бекіту туралы» Қазақстан Республикасы Ұлттық экономика министрінің 2015 жылғы 25 ақпандағы № 130 бұйрығына және «Шектеу іс-шараларын жүзеге асыру қағидаларын бекіту туралы» Қазақстан Республикасы Ұлттық экономика министрінің 2015 жылғы 20 наурыздағы № 239 бұйрығына, «Қазақстан Республикасының Бас мемлекеттік санитариялық дәрігерінің 2020 жылғы 26 маусымдағы № 43 қаулысына өзгерістер мен толықтырулар енгізу туралы» Қазақстан Республикасының Бас мемлекеттік санитариялық дәрігерінің 2020 жылғы 27 шілдедегі № 46 (бұдан әрі - ҚР БМСД № 46 қаулысы), «Қазақстан Республикасының Бас мемлекеттік санитариялық дәрігерінің 2020 жылғы 26 маусымдағы № 43 қаулысына өзгерістер мен толықтырулар енгізу туралы» 2020 жылғы 14 тамыздағы № 47 қаулыларына (бұдан әрі - ҚР БМСД № 47 қаулысы) сәйкес Қазақстан Республикасының халқы арасында COVID-19 (бұдан әрі - COVID-19) коронавирустық инфекциясының таралуының алдын алу мақсатында және Ақмола облысының тұрғындары арасында COVID-19 жағдайларын тіркеуге байланысты, ҚАУЛЫ ЕТЕМІН:

1. Ақмола облысының аумағында шаруашылық және (немесе) өзге де қызметтің және халық өмірінің ерекше жағдайларымен эпидемиологиялық жағдайы тұрақтанғанша дейін Ақмола облысының аумағында шектеу іс-шараларын жүргізуді қамтамасыз ету.

2. Ақмола облысының тұрғындарына:

1) ҚР БМСД № 47 қаулыға № 2 қосымшаға сәйкес жеке қорғаныш құралдарын (бетперделерді) пайдалану және кәдеге жарату алгоритмін сақтауды және кемінде 2 метр әлеуметтік қашықтықты сақтауды қамтамасыз ету;

2) жергілікті атқарушы, құқық қорғау органдарының, жедел және шұғыл медициналық көмектің, мемлекеттік медициналық мекемелердің, санитариялық-эпидемиологиялық қызметтің, өрт сөндірудің, авариялық-құтқару және авариялық-техникалық қызметтердің қызметкерлерін, сондай-ақ стратегиялық объектілер мен тіршілікті қамтамасыз ету объектілерінің өндірістік процесін қамтамасыз ететін қызметкерлерді қоспағанда, сағат 23:00-ден 06:00-ге дейін Ақмола облысының елді мекендерінің аумағы бойынша тұрғындардың жүріп-тұруын шектеу;

3) демалыс күндері 65 жастан асқан адамдарға көшеге шығуды шектеу;

4) әлеуметтік қашықтықты және жеке қорғаныш құралдарын (бетперделерді) пайдалану мен кәдеге жаратуды сақтай отырып, ойын-сауық объектілерісіз саябақтарға, алаңдарға, скверлерге және өзге де демалыс орындарына топта 3 адамнан артық емес немесе бір отбасы мүшелеріне баруға рұқсат беру;

5) отбасылық, естелік іс-шараларды (банкеттер, үйлену тойлары, мерейтойлар, дұға) және адамдар көп жиналатын өзге де іс-шараларды, оның ішінде үйде өткізуге жол бермеу;

6) жерлеу іс-шараларын жүргізу кезінде кемінде 2 метр қашықтықты сақтай отырып, 30 адамнан астам (отбасы мүшелері) жиналуға жол бермеу.

3. Ақмола облысының әкімдігі, аудандар мен Көкшетау, Степногорск қалаларының әкімдері, «Атамекен» ӨКП, тауарлар мен көрсетілетін қызметтердің сапасы мен қауіпсіздігін бақылау басқармасының басшылары қамтамасыз етсін:

1) InfoKazakhstan.kz сайтынан электрондық форматта берілетін Санитариялық нормаларға сәйкестік актісінің негізінде объектілердің қызметін қайта бастауды;

2) қоғамдық мониторинг мүмкіндігі үшін объектінің кіреберісінде Санитариялық нормаларға сәйкестік актісін көзге көрінетін жерге орналастыруды;

3) шектеу іс-шараларын, оның ішінде карантинді енгізу кезеңінде объектілердің жұмысына қойылатын санитариялық-эпидемиологиялық талаптармен танысу үшін InfoKazakhstan.kz сайтында жұмысы туралы халықты, жеке және заңды тұлғаларды хабардар етуді;

4) бұзушылықтарды жою үшін кәсіпкерлердің уақтылы шаралар қабылдауы мақсатында шағымдарды және карантин режимін бұзу фактілерін орналастыру үшін InfoKazakhstan.kz сайтты пайдалануды;

5) шектеу іс-шараларын, оның ішінде карантинді енгізу кезеңінде объектілердің жұмысына қойылатын санитариялық-эпидемиологиялық талаптардың сақталуына кәсіпкерлік субъектілерін тексеруді жүзеге асыратын инспекторлардың, аудиторлық ұйымдардың тізімін InfoKazakhstan.kz сайтына орналастыруды;

6) InfoKazakhstan.kz сайтындағы объектінің паспортына келушілердің үй-жайлардың жоспарланған толтырылуы туралы мәліметтерді кәсіпкерлік субъектісінің енгізуі (шектеу іс-шараларын, оның ішінде карантинді енгізу кезеңіндегі объектілердің қызметіне қойылатын талаптарға сәйкес, № 43 ҚР БМСДҚ-ға, № 47 ҚР БМСДҚ-ға қосымшаларда айқындалатын 1 адамға белгіленген алаң ескеріле отырып айқындалады және енгізіледі);

7) «InfoKazakhstan» электрондық порталының жұмысы іске қосылғаннан кейін, объектілер белгіленген талаптарға сәйкес келген кезде бизнес объектілерінің қызметін қайта бастауға арналған актіні электрондық беру.»;

4. Ақмола облысының әкімдігі, аудандар мен Көкшетау, Степногорск қалаларының әкімдері:

1) көпшілік іс-шараларының (мерекелік, спорттық-көпшілік, ойын-сауық мәдени-көпшілік іс-шараларды, конференция, семинар, көрме және т.б. өткізуге), отбасылық, естелік іс-шараларды (банкеттер, үйлену тойлары, мерейтойлар, дұға), және адамдар көп жиналатын өзге де іс-шараларды, оның ішінде үйде өткізуге жол бермеу;

2) ойын-сауық мекемелерінің (караоке, бильярд, боулинг орталықтары, компьютерлік клубтар, түнгі клубтар, аттракциондар, балалар ойын алаңдары, батуттар және басқалар), кинотеатрларының, букмекерлік кеңселерінің және ересектер мен балаларға арналған өзге де ойын-сауық орындарының, кальян (оның ішінде қоғамдық тамақтану объектілеріндегі) қызметін тоқтата тұру;

3) мәдениет объектілерінің (театрлар, мұражайлар, көрмелер, концерт залдары және т.б.) қызметтерін тоқтата тұру;

4) балаларды сауықтыру лагерлерінің қызметтерін тоқтата тұру;

5) фудкорттардың, банкет залдарының қызметтерін тоқтата тұру;

6) бассейндердің, қалалық, қоғамдық жағажайлардың, ашық аквапарктердің қызметін тоқтата тұру;

7) жәрмеңкелерді, форумдарды, конференцияларды және өзге де ұйымдастырылған бұқаралық іс-шараларды тоқтата тұру;

8) діни мақсаттағы объектілердің (мешіттер, шіркеулер, соборлар, синагогалар және т.б.) қызметтерін тоқтата тұру;

9) жұмыс поездарын қоспағанда, қала маңындағы жолаушылар поездарын, электричкалардың қозғалысын тоқтата тұру, ортақ вагондарды, қалааралық автобустарды, микроавтобустарды құру;

10) ҚР БМСД № 47 қаулыға 14 қосымшаға сәйкес 15 адамнан аспайтын топтардың жиынтығын сақтау кезінде, мектепке дейінгі балалар мекемелерінің кезекші топтардың қызметіне рұқсат беру;

11) ҚР БМСД № 47 қаулыға 19 қосымшаға сәйкес санитариялық нормаларға сәйкестік актісі болған жағдайда, балаларға арналған түзету кабинеттерінің, балалар және ересектерге арналған білім орталықтарының қызметіне жұмыс күндері ғана рұқсат беру (алдын ала жазылу бойынша, топтарда - 5 адамнан артық емес);

12) ҚР БМСД № 47 қаулыға 5 қосымшаға сәйкес санитариялық нормаларға сәйкестік актісі болған жағдайда, (келушілердің 50%-дан асырмай) ашық ауадағы аттракциондардың жұмысына жұмыс күндері ғана рұқсат беру;

13) ҚР БМСД № 47 қаулыға 7 қосымшаға сәйкес санитариялық нормаларға сәйкестік актісі болған жағдайда, сұлулық салондарының, шаштараздардың, СПА орталықтарының және косметологиялық қызмет көрсететін объектілердің қызметіне жұмыс күндері ғана рұқсат беру (клиенттік залда (4 шаршы метрге 1 адам) әлеуметтік қашықтықты сақтау мүмкіндігі есебінен келушілердің толтырылуы және оңтайлы жұмыс аймақтарының шекараларын белгілей отырып, креслолар арасында кемінде 2 метр қашықтық сақталған жағдайда);

14) ҚР БМСД № 47 қаулыға 16 қосымшаға сәйкес санитариялық нормаларға сәйкестік актісі болған жағдайда, (бассейіндерсіз) қоғамдық моншалардың, сауналардың қызметіне жұмыс күндері ғана рұқсат беру (келушілердің 50%-дан асырмай, мүмкіндігі есебінен 4 шаршы метрге 1 адам);

15) ҚР БМСД № 47 қаулыға 8 қосымшаға сәйкес санитариялық нормаларға сәйкестік актісі болған жағдайда, (бассейіндерсіз) фитнес-орталықтардың, (орталықтарының) жаттығу залдарының, (үйірмелердің, секциялардың) спорт кешендерінің қызметіне жұмыс күндері ғана рұқсат беру (клиенттік залда (5 шаршы метрге 1 адам) әлеуметтік қашықтықты сақтау мүмкіндігі есебінен келушілердің толтырылуын 50%-дан асырмау);

16) ұлттық құрама, клуб командалары үшін спорттық жаттығулар жасауға рұқсат беру (30 адамнан артық емес, байланыссыз термометрия жүргізумен, спорт базаларында тұрумен);

17) әлеуметтік қашықтықты сақтай отырып, ашық ауада жеке және топтық жаттығуларды (5 адамнан артық емес) өткізуге рұқсат беру;

18) санитариялық нормаларға сәйкестік актісі болған жағдайда, 4 шаршы метрге 1 адам есебінен келушілердің сыйымдылығын 50%-дан асырмайтындығын сақтау кезінде жабық базарлардың (азық-түлік, азық-түлік емес) қызметіне жұмыс күндері ғана рұқсат беру;

19) ҚР БМСД № 47 қаулыға 5 қосымшаға сәйкес санитариялық нормаларға сәйкестік актісі болған жағдайда, сауда - ойын-сауық орталықтарының (балаларға арналған ойын-сауық орындарының), сауда үйлерінің (бутиктердің), сауда желілерінің қызметіне жұмыс күндері ғана рұқсат беру (келушілердің 30%-дан асырмай, мүмкіндігі есебінен 4 шаршы метрге 1 адам);

20) оқшаулау талаптарын және күшейтілген санитариялық-дезинфекциялық режимді сақтай отырып, медициналық орталықтардың қызметіне (жазылу бойынша) рұқсат беру;

21) санитариялық нормаларға сәйкестік актісі болған жағдайда, күшейтілген санитариялық-дезинфекциялық режимді және бір келушіге 4 м2-ден кем емес арналған алаңды, сағат 10:00-ден 20:00-ге дейін уақытты шектей отырып, туристік учаскелердегі жағажайлардың (қонақ үйлер, шипажайлар, пансионаттар, демалыс үйлері, туристік базалар) және жалға алынған жағажайлардың қызметіне рұқсат беру;

22) онлайн көрсетілмейтін қызметтер үшін «Қазпошта» АҚ-тың жұмыс кестесін жұмыс күндері сағат 09:00-ден бастап 18:00-ге дейін, сенбі күндері сағат 09:00-ден бастап 14:00-ге дейін орната отырып, жұмысын ұйымдастыру;

23) Қазақстан Республикасы Ұлттық Банкі мен Қазақстан Республикасы Қаржы нарығын реттеу және дамыту агенттігінің актілері негізінде уақыты мен санын шектей отырып, қаржы нарығы субъектілерінің қызметіне рұқсат беру;

24) автобустардың желіге барынша шығуын, біркелкі жүру кестесін, отыратын орындар саны бойынша толтырылуын сақтай отырып, қоғамдық көліктің жұмысына рұқсат беру. Күн сайын әрбір рейс алдында (мамандандырылған ұйым немесе оқытылған персонал) қоғамдық көлікті жуу және дезинфекциялау құралдарын қолдана отырып, өңдеу жүргізу. Демалыс күндері қоғамдық көліктің жұмысын тоқтата тұру;

25) ҚР БМСД № 47 қаулысының талаптарын сақтай отырып, мемлекеттік органдардың (ұйымдар, кәсіпорындар), квазимемлекеттік сектор органдарының, ұлттық кампания, өзге де ұйымдардың, сонымен қатар кәсіпкерлік субъектілердің жұмысын рұқсат ету. Сондай-ақ, қызметкерлердің 80%-ынан кем емес (штат кестесі бойынша 30 қызметкерден артық) қашықтық жұмыс атқару түрінде қалады;

26) ҚР БМСД № 47 қаулыға 17 қосымшаға сәйкес күшейтілген санитариялық-дезинфекциялық режимді сақтай отырып, жобалық қуаттың сыйымдылығының 80%-ынан аспайтын туризм объектілері мен халықтың тұруы бойынша қызмет көрсету саласында ұйымдардың (қонақ үйлер, мейманханалар, демалыс үйлер, туристік базалалар, шипажайлық-курорттық мақсаттағы объектілер және т.б.) қызметіне рұқсат беру;

27) ҚР БМСД № 47 қаулыға 6 қосымшаға сәйкес күшейтілген санитариялық-дезинфекциялық режимді сақтай отырып, (алдын ала жазылу бойынша, автосалонда 2 клиенттен артық емес, ТҚС-да 3 клиенттен артық емес, тұрақты жұмыс орындары арасында кемінде 2 метр алшақтықтың болуы кезінде) халыққа жанаспай қызмет түрлерін көрсету объектілеріне (көлік жуу, көлік жөндеу, тұрмыстық техника жөндеу және т.б.) жұмыс тәртібін сағат 10.00-ден 22.00-ге дейін шектелген уақыт бойынша рұқсат беру;

28) күшейтілген санитариялық-дезинфекциялық режимді сақтай отырып, өндірісі тоқтамай жүретін өнеркәсіп кәсіпорындардың; ашық аспанның астында құрылыс жұмыстарына, ауыл және балық шаруашылығы, мал шаруашылығы қызметіне рұқсат ету;

29) күшейтілген санитариялық-дезинфекциялық режимді сақтай отырып, бизнес-орталықтары, (сақтандыру компания, адвокат, нотариус, бухгалтер және консалтинг қызметтері, жылжымайтын мүлік агенттіктері, жарнама агенттіктері, сот орындаушылар және т.б.) валюта айырбастау пункттері, ломбард жұмысын ұйымдастыру;

30) Халыққа қызмет көрсету орталықтарының (бұдан әрі - ХҚКО), оның ішінде арнайы ХҚКО қатаң түрде Egov.kz, жеделхат-бот EgovKZBot 2.0 арқылы алдын ала брондау бойынша, жұмыс күндері (дүйсенбі - жұма) сағат 09:00-ден бастап сағат 18:00-ге дейін, сенбі күндері сағат 09:00-ден бастап сағат 14:00-ге дейін жұмыс кестесін белгілей отырып, ХҚКО (арнайы ХҚКО) жұмысын ұйымдастыру. Жұмыс күндері (дүйсенбі - жұма) Call орталықтарының жұмысын сағат 09:00-ден 18:00-ге дейін ұйымдастыру, демалыс күндері тоқтата тұру;

31) адамдардың жаппай жиналуы мүмкін салтанатты, отбасылық, естелік, ұжымдық және басқа да іс-шараларды өткізбей, бір мезгілде 30 келушіден артық болмайтын жағдайда, 30-дан кем отыратын орыны бар объектілері үшін - есептік қуаттың 50%-ынан артық емес, үстелдер арасындағы 2 метрден кем емес және келушілер арасында 1 метрден кем емес қашықтықты сақтап, жұмыс режимін сағат 10.00-ден 22.00-ге дейін шектей отырып, ашық аспанның астында және үй-жайларда қоғамдық тамақтандыру объектілерінің қызметіне рұқсат беру.

32) бекітілген кесте бойынша санитариялық күн өткізе отырып, азық-түлік дүкендердің жұмыс кестесін сағат 09.00-ден 22.00-ге дейін шектеу;

33) ҚР БМСД № 47 қаулыға 5 қосымшаға сәйкес бекітілген кесте бойынша санитариялық күн өткізе отырып, ашық азық-түлік және азық-түлік емес базарлардың жұмыс кестесің сағат 10.00-ден 17.00-ге дейін шектеу;

34) такси қызметін көрсетуін (2 адамнан артық емес) шектеу;

35) ҚР БМСД № 47 қаулыға 31 қосымшаға сәйкес экскурсиялық қызметті жүзеге асыруға қойылатын талаптарды сақтау;

36) ҚР БМСД № 47 қаулыға 38 қосымшаға сәйкес мемлекеттік ұлттық табиғи парктердің қызметіне қойылатын талаптарды сақтау;

37) осы қаулыға 1 қосымшаға сәйкес демалыс күндері шектеу шараларын енгізуді қамтамасыз ету;

38) қоғамдық көліктерде, таксилерде, өндірістік аумақтарда, әуежайларда, аулалық ойын алаңдарында, азық-түлік және азық-түлік емес базарларда және басқа да қоғамдық орындарда санитариялық және дезинфекциялық өңдеуді өткізу;

39) Қазақстан Республикасының және Ақмола облысының Бас мемлекеттік санитариялық дәрігерінің (бұдан әрі - БМСДҚ) қолданыстағы қаулыларына сәйкес шектеу іс-шараларының сақталуына мониторинг жүргізу және Қазақстан Республикасының қолданыстағы заңнамасына сәйкес әкімшілік жауапкершілікке санитариялық-карантиндік шараларды сақтамайтын тұлғаларды тарта отырып, әкімдіктер жанындағы жеделдетілген топтардың объектілерге іріктеп тексеру жүргізу;

40) халыққа COVID-19 таралуының алдын алу бойынша ақпараттық-түсіндіру жұмыстарын жүргізу;

41) медициналық ұйымдарда, қарттар мен мүмкіндігі шектеулі адамдарға арналған медициналық-әлеуметтік объектілерде, сәби үйлеріне, балалар үйлерінде, әлеуметтік оңалту орталықтарында, интернат үлгісіндегі мүгедек балаларға арналған оқу орындарында карантин режимі және санитариялық-дезинфекциялық режимді сақтау;

42) COVID-19 ауруымен ауыратын науқастарға медициналық көмек көрсетуге тартылған инфекциялық және провизорлық стационарлар қызметкерлерін тұратын орынмен қамтамасыз ету;

43) әртүрлі медициналық ұйымдардың медицина қызметкерлерін бөлек орналастырумен және тамақтандырумен қамтамасыз ету (әртүрлі үй-жайларда, олардың қарым-қатынас мүмкіндігін болдырмай);

44) бір медициналық ұйымның әртүрлі бөлімшелерінің қызметкерлерін үй-жайларда бөлек орналастырумен және тамақтандырумен қамтамасыз ету;

45) үйден тыс тұратын инфекциялық және провизорлық стационарлар қызметкерлерінің COVID-19 таралуының алдын алуға бағытталған орналастыру, тамақтану жағдайларын және басқа да іс-шараларды орындауын бақылауды қамтамасыз ету;

46) қашықтықтан консультация беру мүмкіндігі үшін медицина қызметкерлерінің тұратын жерлерінде интернетке қолжетімділікпен қамтамасыз ету;

47) «Ұлттық сараптама орталығы» ШЖҚ-ндағы РМК-ы Ақмола облысы бойынша филиалының вирусологиялық зертханасының қызметкерлерін тұратын орынмен және тамақтандырумен қамтамасыз ету;

48) медицина қызметкерлері үшін тұратын жерінен жұмысқа дейін және кері бағытта әрбір медициналық ұйым үшін көлікті қамтамасыз ету, кейіннен көлікті дезинфекциялау;

49) ҚР БМСД-нің № 46 қаулыға 32 қосымшаға сәйкес қауіпсіздік шараларын сақтай отырып, COVID-19-дан қайтыс болған адамның мәйітін жерлеуді жүргізуді ұйымдастыру;

50) COVID-19-дан қайтыс болған адамдардың мәйіттерін тасымалдауға арналған автокөлікпен және көмуге қатысатын адамдарға арналған жеке қорғану құралдарымен қамтамасыз ету;

51) ҚР БМСД-нің № 46 қаулыға сәйкес алгоритмнің сақталуын қамтамасыз ету үшін әрбір ауданда COVID-19-дан қайтыс болған адамдардың мәйіттерін көму бойынша бригадаларды құру жөніндегі мәселені шешу.

5. «Бурабай», «Көкшетау» МҰТП-і (Зеренді ауданы):

1) қоғамдық жағажайлардың қызметтерін тоқтата тұру;

2) су қорғау алабының шегінде шаруашылық және өзге де қызметтің тоқтата тұру;

3) кемінде 2,5-3 метр қашықтықты сақтауды ескере отырып, кәдесыйларды сатуға арналған дүңгіршектерді орналастыру;

4) қоғамдық жағажайларға баруға тыйым салу туралы тақтайшаларды орнату;

5) санитариялық-карантиндік шаралар мен қоғамдық тәртіпті сақтауды бақылау мақсатында рекреациялық (жағалаудағы аймақтарды, жеке және қоғамдық жағажайларды) және курорттық аймақтарды патрульдеу;

6) санитариялық нормаларға сәйкестік актісі болған жағдайда, жағалаудағы аймақтардың аумағындағы барлық түрдегі объектілердің, оның ішінде тамақ өнімдерін, балмұздақ, сусындар, гриль, донер, шаурма және басқа да фастфуд түрлерін, азық-түлік емес тауарларды, караоке және басқа да объектілерді өткізу жөніндегі сауда пункттерінің қызметіне рұқсат беруін қамтамасыз етсін.

6. Ақмола облысы Денсаулық сақтау басқармасының басшысы:

1) Қазақстан Республикасының және Ақмола облысының Бас мемлекеттік санитариялық дәрігерінің қолданыстағы қаулыларының талаптарын орындау;

2) Тауарлар мен көрсетілетін қызметтердің сапасы мен қауіпсіздігін бақылау комитетінің аумақтық бөлімшелеріне диагноз қойылғаннан кейін 2 сағаттың ішінде COVID-19 ауруының әрбір жағдайына, оның ішінде U07.2 «COVID-19 коронавирустық инфекциясы (Вирус сәйкестендірілмеген)» коды бойынша шұғыл хабарлама жіберуді қамтамасыз етсін.»;

3) ЖРВИ белгілерімен және COVID-19-ға күдікті науқастарды анықтау мақсатында аулаларды аралап шығу;

4) ЖРВИ, пневмония белгілерімен және температурасы бар COVID-19-ға күдікті науқастарға ПТР әдісімен зертханалық тексеру жүргізу;

5) асқынуды болдырмау мақсатында, халыққа уақытылы медициналық көмекке жүгіну туралы түсіндіру жұмыстарын жүргізу;

6) созылмалы аурулары бар, «Д» есепке алынған науқастарды ерекше есепке алу;

7) эпидемиологиялық жағдайға қарамастан жүкті әйелдерге және балаларға, амбулаториялық бағдарламалық гемодиализ алатын пациенттерге, онкологиялық және онкогематологиялық аурулармен ауыратын, сондай-ақ емдеуді ауыстыру пациенттің өміріне қауіп төндіретін аурулармен ауыратын пациенттерге жоспарлы медициналық көмек көрсетуді жалғастыруды қамтамасыз ету;

8) профилактикалық егулерді қоспағанда, МСАК ұйымдарында жоспарлы скринингтер мен профилактикалық байқаулар көрсетуді тоқтата тұруға;

9) санитариялық-карантиндік талаптар қатаң сақталған жағдайда, кәсіпорындарға шығып, медициналық профилактикалық тексерулер жүргізу үшін емханаларда жеделдетілген топтар құру;

10) тауарлар мен көрсетілетін қызметтердің сапасы мен қауіпсіздігін бақылау аумақтық басқармасының маманы болмаған жағдайда, мәйітті тасымалдау және жерлеу кезінде биологиялық қауіпсіздік шараларының сақталуын бақылауды кестеге сәйкес бұйрықпен жауапты адамды бекіту жолымен МСАК мамандарымен қамтамасыз ету;

11) COVID-19-дан қайтыс болған адамдардың мәйіттерін тасымалдауға арналған автокөлікпен және көмуге қатысатын адамдарға арналған жеке қорғану құралдарымен қамтамасыз етсін.

7. Ақмола облысы полиция департаментінің бастығы:

1) COVID-19 расталған жағдаймен жақын байланыс ретінде қоршаған ортадан анықталған тұлғалар және симптомсыз ағымымен (тасымалдаушылар) тұлғалар үй карантині шарттарының сақталуын бақылауға жәрдемдесу;

2) қызметі рұқсат етілген объектілерде карантиндік шаралардың, санитариялық-дезинфекциялық режимнің сақталуын бақылауға жәрдемдесу. Бұзушылықтар анықталған жағдайда Әкімшілік құқық бұзушылықтары туралы кодексі негізінде тиісті әкімшілік шаралар қолдануын қамтамасыз етсін.

8. Тауарлар мен көрсетілетін қызметтердің сапасы мен қауіпсіздігін бақылау басқармасының басшылары:

1) Қазақстан Республикасының және Ақмола облысының Бас мемлекеттік санитариялық дәрігерінің қолданыстағы қаулыларының талаптарын орындау;

2) COVID-19 науқасын сұрастыру;

3) тәуекел тобындағы адамдар жоқ симптомсыз вирус тасымалдаушылардың ошақтарын қоспағанда (жүрек-қантамыр жүйесінің созылмалы аурулары, қант диабеті, метаболикалық синдром, бүйректің созылмалы ауруларымен ауыратын 60 жастан асқан адамдар, жүкті әйелдер) эпидемиологиялық тексеру картасын ресімдей отырып, COVID-19 жағдайларын эпидемиологиялық тергеп-тексеруді қамтамасыз етсін. COVID-19 жағдайларын эпидемиологиялық тергеп-тексеруді мынадай басымдықта жүргізу керек: симптомдары бар COVID-19 жағдайларының ошақтары; симптомсыз ағымы бар COVID-19 жағдайларының ошақтары; басқа ошақтар. Пациент туралы деректер Қазақстан Республикасы Денсаулық сақтау министрлігінің COVID-19 Веб-қосымшасына енгізіледі;»;

4) COVID-19 алдын алу шаралары туралы халық арасында ақпараттық-түсіндіру жұмыстарын күшейту;

5) санитариялық-карантиндік талаптардың шарттарын сақтамағаны үшін әкімшілік ықпал ету шараларын қабылдауын қамтамасыз етсін.

9. Ақмола облысының ішкі саясат басқармасы, аудандар мен Көкшетау, Степногорск қалаларының әкімдері:

1) бұқаралық ақпарат және әлеуметтік желілер арқылы 2 күн ішінде қосымша қабылданған шектеу шаралары туралы халыққа хабардар ету;

2) халыққа қосымша қабылданған шектеу шаралары туралы жаднамалар, оның ішінде шұғыл және апаттық қызметтердің барлық қажетті байланыстарын көрсете отырып, шектеу іс-шаралары кезеңінде көшелерде қауіпсіздік шараларын, жүріс-тұрыс ережелерін сақтау туралы азаматтарға арналған нұсқаулықтар әзірлеу;

3) облыс тұрғындары арасында жұқтыру ошақтарын оқшаулау және оның таралу қаупін азайту бойынша қабылданатын шаралар туралы бұқаралық ақпарат құралдарында ақпараттық жариялау жүргізуін қамтамасыз етсін.

10. Ақмола облысы бойынша «Ұлттық сараптама орталығы» ШЖҚ-ндағы РМК-нің филиалы Қазақстан Республикасы мен Ақмола облысының Бас мемлекеттік санитариялық дәрігерінің қолданыстағы қаулылары талаптарының орындалуын қамтамасыз етсін.

11. Ақмола облысының Бас мемлекеттік санитариялық дәрігерінің № 2 қосымшаға сәйкес қаулысының күші жойылды деп танылсын.

12. Халықтың санитариялық-эпидемиологиялық салауаттылығы саласындағы қызметті жүзеге асыратын тиісті аумақтың, Ақмола облысының қалалары мен аудандарының Бас мемлекеттік санитариялық дәрігерлері қалыптасқан эпидемиологиялық жағдайға байланысты карантиндік шараларды қатаңдату туралы шешім қабылдауға құқылы.

13. Қаулы меншік нысанына қарамастан, барлық жеке және заңды тұлғалардың орындауы үшін міндетті.

14. Осы қаулыны барлық мүдделі ведомстволардың назарына жеткізу, халықты бұқаралық ақпарат және әлеуметтік желілер арқылы хабардар ету.

15. Осы қаулының орындалуын бақылауды өзіме қалдырамын.

16. Осы қаулы 2020 жылғы 7 қарашадан сағат 00:00-ден бастап, қалыптасқан эпидемиологиялық жағдайға байланысты ықтимал ұзартумен немесе жеңілдетумен күшіне енеді.